ការសរសេរកូដ (Coding) ជាជំនាញមួយដែលអ្នករៀន IT ត្រូវតែចេះ ប៉ុន្តែក៏មាននិស្សិតខ្លះត្អូញត្អែរថា វាស្មុគស្មាញពិបាកយល់ ពិបាករៀន ដោយសារតែមាន Algorithm ច្រើនពិបាកដោះស្រាយ។ ទោះជាបែបនេះក្ដី ក៏មានអ្នកជោគជ័យច្រើនដែរ លើជំនាញមួយនេះ។
សាស្ត្រាចារ្យ ផេង ឧសភា នៃសាកលវិទ្យាល័យភូមិន្ទភ្នំពេញ បានប្រាប់ពីគន្លឹះនៃការរៀនសរសេរកូដ សម្រាប់អ្នកដែលចង់ក្លាយជាអ្នកសរសេរកម្មវិធី ឲ្យទទួលបានជោគជយ។
ជាដំបូង និស្សិតត្រូវរកទិញសៀវភៅសរសេរកម្មវិធីកម្រិតដំបូង ណាដែលប្រែជាភាសាខ្មែរ ព្រោះវាងាយស្រួលអាន រួចរៀនធ្វើតាមអ្វីដែលគេប្រាប់ និងអនុវត្តតាមបន្តិចម្ដងៗ ដើម្បីឲ្យមានគ្រឹះ ក្នុងការបន្តទៅការសរសេរកូដកម្រិតខ្ពស់ ៗ បន្តទៀត។
ជាងនេះទៀត និស្សិតត្រូវព្យាយាមហាត់ដោះស្រាយបញ្ហាតូចៗឲ្យទទួលបានលទ្ធផលជា មុនសិន ឬ ក៏យកបញ្ហានោះមកបំបែកឲ្យបានយល់ ហើយសឹមរកវិធីផ្សេងទៀត ដើម្បីដោះស្រាយ ។
ប្រសិនបើបញ្ហានោះ មាន Algorithm ច្រើន ទាមទារឲ្យនិស្សិតត្រូវមាន ការអត់ធ្មត់ខ្ពស់ ដើម្បីរកឲ្យឃើញពី អ្វីដែលគេចង់បាន។
ចំណុចសំខាន់នោះគឺ ត្រូវចេះឆ្ងល់ ចេះសួរមិត្ត ភក្តិ ឬ សាស្ត្រាចារ្យ ប៉ុន្តែនិស្សិតក៏អាចរកដំណោះស្រាយដោយខ្លួនឯងបានដែរនៅលើ អ៊ីនធឺណិត ហើយក៏ជាកន្លែងដែលអាចស្វ័យសិក្សាបានផងដែរ។ ជាចុងក្រោយ សាស្ត្រាចារ្យបានបន្ថែមទៀតថា និស្សិតក៏មិនអាចខ្វះភាសា បានដែរគឺត្រូវចេះយ៉ាងតិចក៏ភាសាអង់គ្លេសមួយដែរ ដើម្បីជាទុន ក្នុងការសរសេរកម្មវិធី ឲ្យទទួលបានជោគជយ ៕
ប្រភព៖ http://news.sabay.com.kh
Comments