ភ្នំពេញ៖ គ្រូបង្រៀន
គឺជាអ្នកផលិតធនធានមនុស្ស សម្រាប់យកទៅអភិវឌ្ឍន៍ប្រទេសជាតិ ប៉ុន្តែ
អាជីពជាគ្រូបង្រៀន ត្រូវបានក្លាយជាជម្រើសចុងក្រោយសម្រាប់អ្នកសិក្សា
ជ្រើសរើសជាមុខរបរចិញ្ចឹមជីវិត។ ប្រាក់បៀវត្សដ៏តិចតួចស្តួចស្តើង
បានធ្វើឲ្យអ្នកសិក្សាមើលរំលងមុខរបរមួយនេះ
បើទោះបីជាមានបំណិនប្រសប់ផ្នែកគ្រូបង្រៀនតាំងពីក្មេងក៏ដោយ។
ចំណែកឯពលរដ្ឋទូទៅវិញ
តែងតែស្រែកចង់បានគុណភាពអប់រំនៅកម្ពុជាឲ្យមានកម្រិតតាមស្តង់ដា
អន្តរជាតិ តែបែរទៅមើលប្រាក់ខែរបស់គ្រូបង្រៀនវិញ
គឺនៅមិនទាន់មានកម្រិតស្តង់ដាអន្តរជាតិនៅឡើយទេ។
តើប្រាក់បៀវត្សគ្រូបង្រៀនទាប
ពិតជាបានទាញទម្លាក់គុណភាពអប់រំនៅកម្ពុជាពិតមែនឬ?
គ្រូបង្រៀននៅកម្ពុជា ត្រូវបានគេមើលឃើញថា មានជីវភាពខ្សត់ខ្សោយ។
ប្រាក់ខែទាប បានធ្វើឲ្យគ្រូបង្រៀនមួយចំនួនធំ បង្កើតមុខរបរបន្ថែម
ដែលជាហេតុធ្វើឲ្យគ្រូបង្រៀន ត្រូវចំណាយពេលវេលាជាច្រើន
សម្រាប់ប្រកបមុខរបរទីពីរនេះ។
ហើយដោយសារតែគ្រូបង្រៀនបង្កើតអាជីពបន្ថែមនេះហើយ
ទើបពួកគេគ្មានពេលគ្រប់គ្រាន់ នៅក្នុងការស្រាវជ្រាវ
គ្មានពេលវេលាគ្រប់គ្រាន់ក្នុងការយកចិត្តទុកដាក់បង្រៀនសិស្សឲ្យ
បានល្អ។
នៅតាមទីជនបទដាច់ស្រយាល គ្រូបង្រៀន មិនអាចរកប្រាក់បន្ថែម តាមរយៈ
ការបង្រៀនគួរក្រៅម៉ោង លក់ឯកសារឲ្យសិស្ស ឬប្រកបអាជីពផ្សេងៗ
ក្រៅពីធ្វើជាគ្រូបង្រៀន។ ហេតុផលនេះហើយ
ទើបបណ្តាលឲ្យគ្រូបង្រៀនភាគច្រើន មិនចង់ទៅបង្រៀន
នៅតំបន់ជនបទចុងកាត់មាត់ញក។ ពួកគេម្នាក់ៗ បានស្វែងរកទីតាំងបង្រៀននៅ
តាមទីប្រជុំជន ឬទីក្រុង ពីព្រោះកន្លែងដែលមានមនុស្សច្រើនបែបនេះ
ងាយស្រួលឲ្យពួកគេរកចំណូលបន្ថែម តាម រយៈ ការរកប្រាក់ក្រៅម៉ោង។
បញ្ហាប្រាក់បៀវត្សមានកម្រិតទាប
បានធ្វើឲ្យគ្រូបង្រៀនមួយចំនួនធំជួបការលំបាក។ គ្រូខ្លះ
ត្រូវបានបោះចោលសីលធម៌ គុណធម៌ និងភាពថ្លៃថ្នូរក្នុងនាមជាអ្នកអប់រំ
ដើម្បីរកប្រាក់ចិញ្ចឹមគ្រួសារ តាមរយៈការប្រព្រឹត្តអំពើពុករលួយ
លក់នំក្នុងថ្នាក់ លក់វិញ្ញាសា លក់មេរៀន
និងបើកបង្រៀនគួរបន្ថែមជាដើម។ ចំណែកគ្រូបង្រៀនមួយចំនួនទៀត
បានបោះបង់មុខរបរនេះចោលតែម្តង ដើម្បីទៅប្រកបអាជីវកម្មផ្សេងៗ
ដែលអាចរកចំណូលបានក្នុងការចិញ្ចឹមគ្រួសារ។ រីឯគ្រូមួយចំនួនទៀត
ដោយសារតែស្រឡាញ់អាជីពជាគ្រួបង្រៀន ទោះបីជាប្រាក់ខែតិចតួចក៏ដោយ
ក៏នៅតែក្រាញននៀល ដើម្បីបណ្តុះបណ្តាលកូនខ្មែរឲ្យមានចំណេះដឹង
សម្រាប់យកទៅអភិវឌ្ឍន៍សង្គម។
តាមពិតទៅ មុខរបរជាគ្រួបង្រៀន គឺជាមុខរបរស្រាវជ្រាវច្រើន
ស្វែងរកចំណេះដឹងដែលថ្មីៗ រុករកវិធីសាស្ត្របង្រៀនដែលល្អ សរសេរសៀវភៅ
ចងក្រងឯកសារ និងផ្តោតការយកចិត្តទុកដាក់លើការបង្រៀនសិស្ស។
ការងារទាំងនេះ គឺទាមទារឲ្យមានការខិតខំប្រឹងប្រែង
និងត្រូវប្រើពេលវេលាច្រើន ប៉ុន្តែបើប្រាក់ខែ
មិនអាចទ្រទ្រង់ជីវភាពប្រចាំថ្ងៃគ្រប់គ្រាន់ផង
តើគ្រូបង្រៀនមានពេលវេលាឯណា ទៅចូលបណ្ណាល័យស្រាវជ្រាវ មានពេលឯណា
ទៅសរសេរសៀវភៅចងក្រងឯកសារ ព្រោះមួយថ្ងៃៗ ពួកគេខ្វល់តែពីជីវភាព
ខ្វល់តែបើកបង្រៀនគួរក្រៅម៉ោង
ខ្វល់តែធ្វើម៉េចរកប្រាក់ដើម្បីទប់ទល់នឹងជីវភាពគ្រួសារដែលក្រីក្រ
លំបាក។
កន្លងមក ក្រសួងអប់រំ យុវជន និងកីឡា
ក៏ធ្លាប់បានធ្វើកំណែទម្រង់ជាច្រើនហើយដែរ។ ជាពិសេស
ក្នុងមួយរយៈពេលចុងក្រោយនេះ ក្រសួងបានធ្វើការរឹតបន្តឹង
ការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)
ការដំឡើងប្រាក់ខែគ្រូបង្រៀនឲ្យរស់នៅមានជីវភាពសមរម្យ
គឺក្រសួងអប់រំបានដំឡើងបៀវត្សជាបន្តបន្ទាប់។ ជាពិសេសកាលពីឆ្នាំ២០១៤
កន្លងទៅ រដ្ឋាភិបាលបានសម្រេចដំឡើងប្រាក់ខែគ្រូបង្រៀននៅដើមឆ្នាំ២០១៥
បានមួយចំនួនបន្ថែមទៀត។
ប៉ុន្តែការដំឡើងប្រាក់ខែគ្រូបង្រៀន នៅតែមានកម្រិតតិចតួចនៅឡើយដែលមិនអាចឆ្លើយតបទៅនឹងទំនិញនៅលើទីផ្សារ ដែលចេះតែឡើងថ្លៃពីមួយថ្ងៃទៅមួយថ្ងៃ។ មិនមានការសិក្សាស្រាវជ្រាវច្បាស់លាស់ អំពីការចំណាយប្រចាំថ្ងៃរបស់គ្រូបង្រៀននោះទេ ប៉ុន្តែ គេអាចវាយតម្លៃបានថា ប្រាក់ខែដ៏តិចស្តួចស្តើងនេះ ធ្វើឲ្យគ្រូបង្រៀនមួយចំនួននៅតែស្ថិតនៅក្រោមបន្ទាត់នៃភាពក្រីក្រ។ មួយថ្ងៃៗ គ្រួបង្រៀន ត្រូវចំណាយលើម្ហូបអាហារ ចំណាយលើកូនរៀន ទិញសម្ភារប្រើប្រាស់ផ្ទាល់ខ្លួន និងសម្រាប់គ្រួសារ កម្មវិធីសង្គមនានា ដូចជា អាពាហ៍ពិពាហ៍ បុណ្យផ្សេងៗ និងត្រូវចំណាយរាប់រយជំពូកដទៃទៀត។
ប៉ុន្តែការដំឡើងប្រាក់ខែគ្រូបង្រៀន នៅតែមានកម្រិតតិចតួចនៅឡើយដែលមិនអាចឆ្លើយតបទៅនឹងទំនិញនៅលើទីផ្សារ ដែលចេះតែឡើងថ្លៃពីមួយថ្ងៃទៅមួយថ្ងៃ។ មិនមានការសិក្សាស្រាវជ្រាវច្បាស់លាស់ អំពីការចំណាយប្រចាំថ្ងៃរបស់គ្រូបង្រៀននោះទេ ប៉ុន្តែ គេអាចវាយតម្លៃបានថា ប្រាក់ខែដ៏តិចស្តួចស្តើងនេះ ធ្វើឲ្យគ្រូបង្រៀនមួយចំនួននៅតែស្ថិតនៅក្រោមបន្ទាត់នៃភាពក្រីក្រ។ មួយថ្ងៃៗ គ្រួបង្រៀន ត្រូវចំណាយលើម្ហូបអាហារ ចំណាយលើកូនរៀន ទិញសម្ភារប្រើប្រាស់ផ្ទាល់ខ្លួន និងសម្រាប់គ្រួសារ កម្មវិធីសង្គមនានា ដូចជា អាពាហ៍ពិពាហ៍ បុណ្យផ្សេងៗ និងត្រូវចំណាយរាប់រយជំពូកដទៃទៀត។
ប្រាក់ខែគ្រូបង្រៀនសព្វថ្ងៃ រាប់តាំងពីគ្រូមតេយ្យសិក្សា បឋម
អនុវិទ្យាល័យ វិទ្យាល័យ និងឧត្តមសិក្សា បៀវត្សគ្រូបង្រៀន
គឺស្ថិតនៅក្រោម១លានរៀលនៅឡើយ។ តើប្រាក់ខែប៉ុណ្ណឹង
ពេលណាទើបគ្រូបង្រៀនមានជីវភាពសមរម្យនឹងគេ? តើពេលណាទើបគ្រូបង្រៀន
ឈប់ខ្វល់ជាមួយមុខរបរក្រៅម៉ោងតទៅទៀត ហើយផ្តោតតែលើការងារបង្រៀន?
ដូច្នេះ ការដំឡើងប្រាក់ខែគ្រួបង្រៀនឲ្យមានជីវភាពសមរម្យ
គឺជាគន្លឹះអាទិភាព ដែលក្រសួងអប់រំ យុវជន និងកីឡា
គួរយកចិត្តទុកឲ្យមែនទែន។ ប្រសិនបើគ្រូបង្រៀន
នៅតែមានកម្រិតជីវភាពក្រីក្រនៅឡើយ
វិស័យអប់រំប្រាកដជារាំងស្ទះមិនអាចដំណើរការបានល្អនោះទេ។ លើសពីនេះ
កំណែទម្រង់ដែលរដ្ឋាភិបាលកម្ពុជា
បានប្រកាសតាំងពីក្រោយការបោះឆ្នោតជាតិឆ្នាំ២០១៣នោះ
ប្រាកដជាពិបាកនឹងទទួលជោគជ័យណាស់ ហើយគុណភាពអប់រំរបស់កម្ពុជា
នឹងនៅតែចោទជាបញ្ហា ពោលគឺគុណភាពអប់រំ នៅតែទន់ខ្សោយ
បើសិនបញ្ហាប្រាក់នៅតែធ្វើឲ្យគ្រួបង្រៀនរស់ទាំងត្រដាបត្រដួសនោះ៕
Comments