ខណៈការប្រឡងមធ្យមសិក្សាទុតិយភូមិកាន់តែខិតជិតមែនទែនទៅហើយនោះ រដ្ឋមន្រ្តីក្រសួងអប់រំ យុវ ជន និងកីឡា លោក ហង់ ជួនណារ៉ុង បានបង្ហោះសារមួយតាមបណ្ដាញសង្គមទំនាក់ទំនងហ្វេសបុករបស់ក្រសួងនៅ ព្រឹកថ្ងៃទី១៩ ខែសីហា ដោយបញ្ជាក់ថា បេក្ខជនដែលកំពុងត្រៀមខ្លួនប្រឡងបាក់ឌុបនាពេលខាងមុនដ៏ខ្លីនេះ ត្រូវខិតខំប្រឹងប្រែងដើម្បីប្រឡងឱ្យអស់សមត្ថភាពនូវអ្វីដែល ខ្លួនបានរៀន និងចេះចាំពីសាលាមក ហើយមិនត្រូវនាំគ្នាមានគំនិតថា នឹងអាចបានលួចមើលប្រ៊ីយ៉ុងចម្លងបានឡើយពីព្រោះឯកឧត្តម បានក្រើនរំលឹកសារជាថ្មីម្ដងទៀតថា ការប្រឡងយកសញ្ញាបត្រមធ្យមសិក្សាទុតិយភូមិរបស់បេក្ខជននៅគ្រប់ មណ្ឌលទាំងអស់ នឹងត្រូវបានដាក់ពង្រាយកងកម្លាំងសមត្ថកិច្ច មន្រ្តីសង្គមស៊ីវិល និងមន្រ្តីអង្គភាពប្រឆាំងអំពើពុករលួយ ដើម្បីជួយឱ្យទៅតាមដានភាពមិនប្រក្រតីក្នុងការប្រឡង ដូចនៅឆ្នាំមុនកន្លងទៅនេះដែរ។
ប្រការ១៖ ប្រសិនបើបេក្ខជន នាំយកនូវសំណៅឯកសារ ទូរសព្ទដៃ និងគ្រឿងអេឡិចត្រូនិចចូលទៅក្នុងតំបន់ប្រឡង ឬក៏អង្គុយខុសលេខតុជាដើម បេដ្ខជននោះនឹងត្រូវបានពិន្ទុសូន្យ និងធ្លាក់ដោយស្វ័យប្រវត្តហើយមិនបានប្រឡងទៀតទេ។
ប្រការ ២៖ ប្រសិនបេក្ខជនលួចចម្លងគ្នានៅក្នុងបន្ទប់ប្រឡង ហើយសន្លឹកមូលវាចារ និងសន្លឹកកិច្ចការមានចម្លើយដូចគ្នា ឬក៏សន្លឹកកិច្ចការនោះមានចម្លើយដូចគ្នាបិះបិតទៅនិងសំណៅឯកសារ ណាមួយដែលគេបានសរសេរទុកមុន ក្រោយពីការត្រួតពិនិត្យស្វែងរកឃើញដូច្នោះ បេក្ខជននោះ នឹងត្រូវបានពិន្ទុសូន្យ ហើយនឹងធ្លាក់ដោយស្វ័យប្រវត្តផងដែរ។
ប្រការ ៣៖ ប្រសិនបើមានបេក្ខជនបានរៃអង្គាសថវិកាឱ្យអនុរក្សប្រចាំបន្ទប់ ឬក៏ឱ្យកិច្ចការរបស់ខ្លួនទៅឱ្យអ្នកដទៃបានចម្លងតាម ឬក៏រត់ឯកសារទៅខាងក្រៅ ក៏នឹងធ្លាក់ដោយស្វ័យប្រវត្ត និងថែមទាំងព្យួរឈ្មោះមិនឱ្យប្រឡងសារជាថ្មីក្នុងរយៈមួយឆ្នាំ បន្ទាប់។
ប្រការ៤៖ បេក្ខជនដែលនាំយកអាវុធ ឬជាតិផ្ទុះជាប់ខ្លួនចូលក្នុងបន្ទប់ប្រឡង ឱ្យខូចខាតសម្ភារៈក្នុងបន្ទប់ប្រឡង ឬក៏ឱ្យគេប្រឡងជំនួសខ្លួន ក៏ត្រូវធ្លាក់ដោយស្វ័យប្រវត្ត និងមិនអាចប្រឡងសារជាថ្មីម្ដងទៀតក្នុងរយៈពីរឆ្នាំជាបន្ត បន្ទាប់។
ចំណែកប្រការ៥៖ ប្រសិនបបើបេក្ខជនធ្វើឱ្យខូចសណ្ដាប់ធ្នាប់ក្នុងការប្រឡងឱ្យមាន ភាពរយ៉េរយ៉ៃ ឬបង្កើតឱ្យមានក្រុមសម្រាប់រៀបចំចម្លង នឹងត្រូវធ្លាក់ដោយស្វ័យប្រវត្ត មិនត្រឹមតែប៉ុណ្ណោះ ក្រសួងនឹងបញ្ជួនបេក្ខជនល្មើសនោះទៅកាន់តុលាការបន្ថែមទៀត។
លោក ហង់ ជួនណារ៉ុង ក៏បានអំពាវនាវឱ្យបុគ្គលិកបម្រើការសិក្សាទាំងអស់ ត្រូវប្រកាន់ផ្ជាប់ឱ្យបានដាច់ខាត នូវកំណែទម្រង់ទាំងឡាយទាំងពួងរបស់ក្រសួងអប់រំ ដើម្បីជាការលើកស្ទួយដល់កេរិ៍ឈ្មោះរបស់គ្រូបង្រៀន និងក៏ដើម្បីឱ្យសិស្សខិតខំប្រឹងដោយខ្លួនឯង ដើម្បីប្រឡង។
គួរ បញ្ជាក់ថា ការអំពាវនាវរបស់ឯកឧត្តមរដ្ឋមន្រ្តីក្រសួងអប់រំ យុវជន និងកីឡាខាងលើនោះ បានកើតឡើងបន្ទាប់ពីការបរិច្ឆេទនៃការប្រឡងយកសញ្ញាបត្រមធ្យម សិក្សាទុតិយភូមិរបស់បេក្ខជនប្រឡង នៅក្នុងឆ្នាំ២០១៥-២០១៦នេះ កាន់តែខិតជិតមែនទែន គឺនឹងប្រព្រឹតធ្វើឡើងនៅថ្ងៃចន្ទទី២៤ ខែសីហា ឆ្នាំ២០១៥ខាងមុខដ៏ខ្លីនេះ៕
ប្រភព៖ Cool107
Comments